سلسلة حول #الوعي_التجاري الجزء 3

سلسلة حول  #الوعي_التجاري الجزء 3

عبد الله كميدي

اليوم نتكلمو على الكذب عند بعض التجار
◀ أولا: بعض التجار يكذبون، وكاين لي يكذب وهو رجل طيب، ولا يدري أنه يكذب، مثلا فاش تلبس شي حاجة، يقولك: "جات معاك زوينة"، هاديك عبارة "جات معاك زوينة" ولّات طيبة على لسانو كيقولها لأي واحد، هذا غير مثال، وعليه: ماتخليهش يأثر عليك.

◀ ثانيا: واش من نيتكم تصدقو البائع فاش يقول هادي راسمالها 100 درهم وثمن البيع هو 120، وتبقى معاه مني منك تجيبها ب 90 درهم (يعني بأقل من راسمالها)، ويقولك والله يلا بغيت نتعاون معاك... وتشكرو وتجي فرحان، واش هو فاتح الحانوت باش يخسر في السلعة؟ هاداك رد منو البال مرة أخرى ممكن يكون كذاب.
ولكن كاين حالات ممكن يبيعو براس المال أو الخسارة وهي نادرة جدا جدا بحال مثلا إذا كانت هاديك السلعة معيبة أو فات وقتها.
◀ ثالثا : كم يربح البائع؟ هاديك القضية ديال راني رابح معاك غير 3 دراهم ما كايناش إلا عند البقالة، وأحيانا في السلع ديال 10 دراهم فأقل، وبعض الاستثناءات القليلة.
إذن كم يربح؟ إليكم بعض الأمثلة:
-مثال1: الأقلام لي في الصورة ثمنهم في المكتبات 6 دراهم وأحيانا أقل بقليل، أما ثمن الجملة باش ياخذهم البائع غير 1.80 درهم فقط، أكثر من الثلثين كلها رباح.

-مثال2: الأحذية النسائية ريكلام غالبا كيتباعو ب70 درهم، أما ثمن الجملة مابين 40 درهم و50، وقليل لي ب60، يعني الرباح: 30درهم و20.. والأحذية لي يتباعو مثلا ب 150درهم كيكون رباح 50درهم أو أقل بقليل، ونادرا يربح 20.
-مثال3: النظارات الشمسية للرجال لي عند الفرّاشة ولي عند أغلب المحلات التجارية كيتباعو مابين 30 درهم و60، وربما أكثر، ثمن الجملة: الأرخص 6 دراهم والأغلى 15، وأكثرها ب12 درهم. أما النسائية زايدة ببضعة دراهم فقط حسب الشكل.
هاد شي ذكرتو غير باش تعرفوه وصافي، وتكونو على علم، ماشي باش طالبو بنقص الثمن لأنه في الغالب ماينقصوش.
◀ رابعا: شحال من مرة طلب منك البائع مثلا 200 درهم، وانت تعطيه 80 درهم، وهي مْسَلّْكاه، وانت بقيت ثابت في 80 مابغيت تزيد والو، وبديت تهيأ باش تغادر، هنا البائع كيبغي يقبل منك هاداك الثمن ولكن كتجي مفضوحة بزاف، من 200 إلى 80 !!!، في هاذ اللحظة يتدخل البائع الثاني لي هو شريك الأول أو خدام معاه، ويقول: "تصايب مع الناس آصحبي، شحال عطاوك؟" "صافي غير شدها هادو راهم كْليان". هنا كيعجبك الحال وتشكر البائع الثاني، ولكن خاصك تعرف هاداك راه تدخل لإنقاذ الموقف.. واش هو يخسّر خاطر صاحبو باش يرضيك انت لي مايعرفكش؟ هاديك تمثيلية معروفة عندهم.
◀ خامسا: واش كاين الفرق في الثمن ما بين الفرّاشة ومول المحل؟ بالنسبة للثمن المطلوب الأولي ماكاينش فرق غالبا، ولكن الفرق في الثمن النهائي بعد المفاوضات.. مول الفرّاشة يبان ليه الرباح مايطلقكش، أما صاحب المحل لا، ماتسلكوش حيت عندو مصاريف أخرى: الكراء - الكهرباء- الضريبة....
وللتذكير: هذه الأمور لا تكلف كثيرا ولكن معرفتها خير من جهلها.
المنشور المقبل: نتكلمو على بائعي الدجاج، شحال من مرة طلب منك 13 درهم للكيلو، وأصلا كاتبها في سبورة الأثمنة، وتعطيه 11 يقولك مرحبا، علاش؟؟ هنا كاينة إن وأخواتها، وهي معروفة عند صحاب الدجاج خصيصا.