التوجيه بعد البكالوريا في الاقتصاد والتدبير : ENCG-ISCAE-EST-ISTA

التوجيه بعد البكالوريا في الاقتصاد والتدبير : ENCG-ISCAE-EST-ISTA

السلام عليكم تلاميذ و تلميذات السنة الثانية بكالوريا ، من بعدما دوزنا الحلقة الأولى من سلسلة الآفاق ما بعد البكالوريا و لي كانت بخصوص قطاع الصحة اليوم إن شاء الله و استجابة لطباتكم غادي نهضرو على قطـــاع الإقتصاد و التدبير ما بعد البكالوريا

هاد القطاع لي كايتعتابر من أكثر المجالات حيوية فسوق الشغل و لي كايعرف إقبال كبير بزااف و لهذا غادي نعطيكم معلومات بالتفصيل على بعض المؤسسات و المدارس و المعاهد العليا العمــــــومية لي كاتوفر تكوينات فمجال الإقتصاد و التدبير :

#الأفـــاق_مابعد_البكـــالوريا

#الحلقة_2_قطــاع_الإقتصاد_و_التدبير 📊📈

1- المدرسة الوطنية للتجارة و التسيير ENCG :

هي مدرسة كاتتواجد حاليا ف 10 مدن ، كادوم فيها الدراسة 5 سنوات كاتسالي بالحصول على ديبلوم خاص بهاد المدرسة فواحد من بزاف ديال التخصصات المتاحة بحال التجارة الدولية، التدبير المالي، تدبير الموارد البشرية ... و ناس لي تخرجوا من هاد المدارس كايمكن ليهم يشتاغلوا كأطر عليا فالتسيير ديال المقاولات و الشركات و المؤسسات البنكية ... و أيضا يمكن ليهم ولوج أسلاك الوظيفة العمومية

باش تترشح لولوج هاد المدرسة كايخص باك علوم تجريبية أو علوم رياضية أو علوم الإقتصاد و التدبير ، من بعد الترشيح كاتجي المرحلة الأولى ولي هي الإنتقاء الأولي لي كاتكون بناء على %75 وطني + %25 جهوي ، عتبة الإنتقاء كاتختالف على حسب نوع البكالوريا ، مثلا العام الفايت كانو عتبات الإنتقاء على الشكل التالي : باك علوم رياضية 13,45 / باك علوم تجريبية 15,45 / باك علوم الإقتصاد و التدبير 12,55

لي تقبل فعملية الإنتقاء كايدوز للمرحلة الثانية و لي هي الإختبار الكتابي

2- المعهد العالي للتجارة و إدارة المقاولات ISCAE :

معهد لي كايتعتابر من بين أرقى المعاهد العمومية في مجال الإقتصاد و التدبير ، كايتواجد فكل من مدينتي الدارالبيضاء و الرباط ، كادوم فيه مدة الدراسة فسلك الإجازة الأساسية في التدبير 3 سنوات من بعد الباك ، و لي كاتفتح الأبواب لإستكمال الدراسة فأكبر المدارس العليا الأوروبية

ولوج هاد المعهد كايتطلب التوفر على شهادة بكالوريا علوم تجريبية أو علوم رياضية أو علوم الإقتصاد و التدبير + السن أن لا يتجاوز 21 سنة ، بطبيعة الحال كاينة مرحلة الإنتقاء الأولي لي كاتكون بناء على %75 وطني + %25 جهوي و العتبة كاتكون مرتفعة بشكل ملحوظ فمثلا السنة الماضية كانت العتبة هي 16,95 للباك علوم رياضية و 17,00 للباك إقتصاد و 17,99 للباك علوم فيزيائية و كــانت 18,20 للباك علوم الحياة و الأرض

من بعد كاينة المرحلة الثانية لي هي الإختبار الكتابي و عاد كاتجي المرحلة الثالثة لي هي الإختبار الشفوي ... يعني كايدوزوك من عين الإبرة

3-المدرسة العليا للتكنولوجيا EST :

هي مدرسة كاتتواجد فعدة مدن ، كادوم فيها الدراسة سنتين كاتسالي بالحصول على شهادة التقني العالي أو ما يسمى بالديبلوم الجامعي للتكنولوجيا DUT و لي كايمكن مولاه يا إما من متابعة الدراسات العليا فسلك الإجازة المهنية أو ولوج وحدة من المدارس و المعاهد العليا بحال ENCG و ISCAE ... ، و أيضا يمكن ولوج سوق الشغل مباشرة بشهادة DUT كتقني عالي فواحد من التخصصات لي كاتوفرها هاد المدرسة بحال تقنيات التدبير ، تدبير الموارد البشرية ، تقنيات التدبير التسويقي ...

ولوج هاد التخصصات كايشتارط بكالوريا علمية أو إقتصاد + السن أن لا يتجاوز 21 سنة ، دائما هناك إنتقاء أولي بناء على %75 وطني + %25 جهوي كملاحظة عتبات الإنتقاء كاتلعب ما بين 13 تال 14 بالنسبة لباك علوم تجريبية ـ و ما بين 11 تال 12 بالنسبة لباك علوم رياضية و علوم الإقتصاد و التدبير ، مكـــاينش كونكور يعني لي داز فالإنتقاء راه شد بلاصتوا

4- المعهدال متخصص للتكنولوجيا التطبيقية ISTA :

هو معهد تابع لمكتب التكوين المهني و كايتواجد تقريبا فكل مدينة بحال سبيطار  كادوم فيه الدراسة سنتين كاتسالي بالحصول على ديبلوم التقني المتخصص لي كايأهل لولوج سوق الشغل كتقني فواحد من التخصصات لي كايوفرها المعهد بحال تدبير المقاولات ، التسويق ...

ولوج هاد التخصصات كايتطلب بكالوريا علمية أو إقتصاد ، كايكون إنتقاء فقط بدون مباراة

و للإشارة فبض المرات فاش كايكون الطلب كبير على هاد التخصصات راه كايديرو العتبة 12 فما فوق ، أما فاش ماكايكونش الطلب فراه بعض المرات كايكون ولوج مباشر


إسحاق غانم - مؤطر في التوجيه المدرسي و الجامعي

التوجيه بعد البكالوريا لولوج  الكليات و المعاهد العليا في الصحة :FMP-FMD-ISPITS